A zanfona espertou a curiosidade de tódolos folcloristas de finais do XIX e comezos do século XX. Un dos primeiros e máis destacados foi o boticario Perfecto Feijoo (1858-1935). Este gaiteiro recolleu melodías vocais, de gaita e tamén de zanfona. Foi o impulsor e director do coro galego Aires d'a terra, que gravou o primeiro disco de música galega no 1904.
Nesta foto, posa en 1919 para o fotógrafo Pelayo Mas que titulou a imaxe Perfecto Feijoo, zanfoñeiro. A imaxe está incluída no libro Galicia en blanco y negro (Espasa Calpe, Madrid, 2000), de Ramón Pernas, Xosé Enrique Acuña e José Luís Cabo.
Ademais de coa zanfona, Feijoo aparece vestido coma se fose un cego ambulante de finais do século XIX.
