A hermida de san Lourenzo volve estar en territorio de Cela
Retrouso / Cela
O
Tribunal Superior de Xustiza de Galicia deulle a razón a Bueu no contencioso
que mantiña co Concello de Marín polos seus lindes entre Cela e Ardán. As
diferencias estaban relacionadas coa zona montañosa de san Lourenzo, que se
disputan as comunidades de montes das dúas parroquias. Dentro dese
territorio, atópanse as ruínas da hermida de san Lourenzo, as da foto, onde
tradicionalmente se realizaba unha romería o día 8 de agosto.
A sentencia anula o acto administrativo dun Consello da Xunta do 2000 que tratou este tema. Daquela, a administración galega reafirmou as aspiracións marinenses ó ratificar un deslinde firmado no ano 1938, en plena Guerra Civil, polo responsable local do Movimiento de Bueu. Fronte a ese documento, o TSXG fixo caso a outro anterior, do 1890. Ademais, a sala considerou abundantemente probada a ubicación da devandita capela na parroquia de Cela, pois existen varias referencias históricas do século XVII que así o confirman. O Tribunal tamén tivo en conta que cando o templo se deteriorou, o santo foi traslado á igrexa de Santa María de Cela, onde permanece aínda hoxe.
Marín recorrerá
O alcalde do Concello de Marín, Antonio Santiago, fixo pública a súa intención de “pelexar nos xulgados” por eses terreos. A seguinte vía de reclamación é o Tribunal Supremo. Desde Cela, os comuneiros afirmaron que non hai ningún problema en que o uso do monte sexa compartido, como, por outra banda, se veu facendo desde sempre.